مجاهد محمد عيسى
ولايه جنوب دارفور هي من اشده الولايات ظلما في تاريخ السودان وهي تاني اكبر ولايه في السودان من حيث عدد السكان كلنا اتولدنا فيها وعشنا فيها وشوفنا الظلم والمر والحنظل فيها.
انا شخصيا بالشكل الحالي ما بسميها ولايه حتي انما قول قريه ولا ريف بالرغم من انه جاها اكتر من الف حاكم ووالي خلال ٧٠ سنه من عمر السودان وماذالت كما هي .
نواقص الولايه:
الكهرباء
عشرين سنه قضيناها في جنوب دارفور بنقرا بي شمع ولا بي بوابير ولا تقعد تشحن تلفونك نص الليل عشان الصباح تتكلم بيهوا تقعد تشوف امك واخواتك المحبوسين جوه البيوت في ضلام ولا في الحوش عشان الكهرباء مافي بتزكر سنه ٢٠٠٦م زميلنا مصعب يمشي يتشاكل مع خفير مسجد عبد الوارث عشان شغل ليه البابور عشان هو ممتحن شهاده سودانيه.
هل الولاه البيجوا الولايه ما عارفين قضيه كهرباء ولايه جنوب دارفور بي عاصمتها نيالا هل يجي والي يقعد لينا خرته ويمشي زي الالف القبلوا
المويه:
ما اظن انا اخر مره متين بتزكر انه ماسوره بيتنا اشتغلت ٢٤ ساعه بدون ما تقطع ولا سهر الوالده وامهاتكم الليل كلوا عشان يملوا مويه من الماسوره عشان حتقطع الصباح حكومه تجيب ليك المويه بعد الساعه ٢ صباحا والوالي قاعد بيحضر بعيونه بدون ما يتصرف ولا يعمل سدود ولا يراجع محطات المويه ولا مشروع حوش البقاره الي من اتولدنا بنسمع بيهوا الي اليوم مافي اي حكومه اشتغلت فيه اساسا ولايه جنوب دارفور بتكب مويه من بتاع المويه من سنه ١٠٠٠ لي سنه ٢٠٢٠م بنفس الطريقه لا شفنا مويه ولا حاجه.
الامن
فلان اتقتل علاني اتنهب ي زول ما تتطلع بالليل ما تمشي بالشارع دا لانه خطر ولايه ولا منطقه حربيه ما عارفنها ووالي ورا والي قاعدين يتفرجوا علي الوضع المزري وكم شخص اتقتل ليه اخوه ولا ابوه ولا اهله في جنوب دارفور والله اعلم منو المسؤول وصلت لي درجه انهيار الولايه وهجره معظم سكان جنوب دارفور ووالي ما شاء الله عليه قاعد بيتفرج هل الامن حق ولا مطلب انا لو عايش مع مجموعه في الصحراء بأمن نفسي خليك من ولايه كامله
طريق الفاشر نيالا
تكون مسافر من جنوب لي الخرطوم كأنك مسافر ايام الرسول صلي الله عليه وسلم لكن بي محرك عربيه بدل من حصان ولا جمل ومافي اي فرق بينك وبين ايام الرسول عليه الصلاه والسلام العربيه تجدعك فوق وتنزلك تحت والغبار يملاك من ساسك لي راسك عشان تقطع ليك مسافه ٢٠٠ كيلو من نيالا لي الفاشر سنه ٢٠٢٠م والناس وصلت للقمر والمريخ ونحنا في جنوب دارفور ما قادرين نصل لي الفاشر بي سلام
التعليم
جنوب دارفور من اسوء الولايات في العالم من ناحيه الفصول والتجهيزات والاداره للتعليم نحنا حرفيا كملنا المنهج حق الشهاده الثانويه برانا في بيوتنا اقسم بالله واجيال ما قدرت تتعلم لانه مافي بيئه تعليم في الولايه لا فصول زي الناس ولا مدارس في المحليات ولا حتي في الولايه الام وقرايه احسن عدمها بس الحمدالله
الصحه
مافي صحه فما حاعلق عليها دي
التنميه:
اخر مشروع اتعمل في ولايه جنوب دارفور مشروع تنموي شخصيا انا ما عارفه سنه كم ممكن الشباب في المجموعه هنا يقولوا لي اظن انا نسيت ولا حاجه ٤٠ – ٥٠ سنه طيب سؤال مهم اموال سكان الولايه البتنزل في البنوك دي قاعده بتمشي وين ولي الفايده منها شنو ولا البنوك ما بتعمل مشاريع في الولايه ؟؟؟ طبعا غير شبكه الاتصالات التقول انت في سنه ١٩٤٥م لمن اكتشفوا التواصل يدوب بين السكان من مكان لي مكان ولا اقل من التاريخ دا تقريبا.
وين دخل الولايه قاعد بيمشي من ضرائب وزكاه وجبايات وجمارك عربات ليبيا في الولايه والثروه الحيوانيه ورسوم البورصه والمحليات ال ٢١ ولايه جنوب دارفور من اغني الولايات في السودان ومن افقرها في نفس الوقت
اها حنقعد ننتظر في وضعنا السئ دا ونقعد ننتظر يجينا والي من الخرطوم عشان يقعد يقضيها لينا اكل وشراب ونوم ونحنا بنشكي ليه زي الشفع ولا حنتحرك ونجيب والي من عندنا عشان امي وامك وعشان ابوي وابوك وعشان اهلي واهلك عشان اولادي واولادك دي ارضي وارضك بيتي وبيتك ومستقبلي ومستقبلك
استغفر الله العظيم واتوب اليه